নগাঁওৰ মৰিকলঙত চাঞ্চল্যকৰ অপহৰণ কাণ্ড
ৰঙিলী বাৰ্ত্তাসেৱা- নগাঁৱত সংঘটিত হয় এক চাঞ্চল্যকৰ অপহৰণকাণ্ড । মৰিকলং টাউন আৰক্ষী চকীৰ ওচৰৰ পৰা নিশা ১৮ বছৰীয়া যুৱতীক অপহৰণ কৰে।অভিযোগ অনুসৰি পঞ্জাৱৰ ফৰিদপুৰ জিলাৰ জেতোমণ্ডিৰ বিজেন্দ্ৰ সিং নামৰ লোকজনে ঔষধ বিক্ৰী কৰিবলৈ আজিৰ পৰা প্ৰায় পোন্ধৰ দিন পূৰ্বে নগাঁৱত উপস্থিত হৈছিল ৷ নগাঁৱৰ মৰিকলঙৰ পথৰ দাঁতিত আশ্ৰয় লৈ ভ্ৰাম্যমাণ বাহনৰ জৰিয়তে বিভিন্ন আয়ুৰ্বেদিক ঔষধ বিক্ৰী কৰি ধন উপাৰ্জন কৰি আছিল পৰিয়ালটোৱে । মৰিকলঙৰ পথৰ দাঁতিত আশ্ৰয় লৈ থকা পৰিয়ালটোৰ ওপৰত বুধবাৰে পুৱতি নিশা এটা দুৰ্বৃত্তৰ দলে আক্ৰমণ কৰি পৰিয়ালটোৰ ১৮ বছৰীয়া জ্যেষ্ঠ কন্যাক অপহৰণৰ উদ্দেশ্যে মুখত সোপা দি গাড়ীত উঠোৱাৰ সময়তে কণমানি সন্তানে চিঞৰ-বাখৰ আৰম্ভ কৰে । লগে-লগে পিতৃ-মাতৃয়ে দুৰ্বৃত্তৰ দলটোক বাধা প্ৰদান কৰাত পিতৃকো আক্ৰমণ কৰি যুৱতীগৰাকীক লৈ উধাও হয় দুৰ্বৃত্তৰ দলটো । অপহৰণ কৰি নিয়া পাঁচ-ছয়জনীয়া দুৰ্বৃত্তৰ দলটো হাৰিয়ানাৰ বুলি চিনাক্ত হোৱাৰ কথাও উল্লেখ কৰে যুৱতীগৰাকীৰ পিতৃয়ে । পূৰ্বেও গুৱাহাটীৰ জালুকবাৰীৰ পৰা এবাৰ যুৱতীগৰাকীক অপহৰণৰ চেষ্টা কৰি এই চক্ৰটোৰ সদস্য আৰক্ষীৰ জালত পৰিছিল বুলিও পিতৃগৰাকীয়ে জনায় । বুধবাৰে পুৱতি নিশা পঞ্জাৱৰ পৰিয়ালটোক আক্ৰমণ কৰি যুৱতীক অপহৰণ কৰি নিয়া ঘটনা সন্দৰ্ভত নগাঁৱৰ মৰিকলং আৰক্ষী চকীত এজাহাৰ দাখিল কৰিছে পৰিয়ালটোৱে। ঘটনা সন্দৰ্ভৰ আৰক্ষীয়েও অনুসন্ধান অব্যাহত ৰখা বুলি জানিব পৰা গৈছে ।