ডিব্ৰুগড় প্ৰেছ ক্লাবৰ উদ্যোগত ‘আমাৰ আলহী অনুষ্ঠানত বিশিষ্ট চাহ বিশেষজ্ঞ উদ্ধৱ চন্দ্ৰ শৰ্মা
এম হাছিম আলী,ডিব্ৰুগড়,ৰঙিলী বাৰ্ত্তাসেৱা- চাহ উদ্যোগৰ সকলো অংশীদাৰৰ পৰা এক সামগ্ৰিক আৰু সৰ্বাংগীন দৃষ্টিভংগীৰ জৰুৰী প্ৰয়োজন আছে, যাতে প্ৰত্যাহ্বানসমূহৰ সন্মুখীন হৈ আহিবলগীয়া শতিকাসমূহৰ বাবে অসমৰ চাহ উদ্যোগ আগবাঢ়িব পাৰে। বিশিষ্ট চাহ খেতিয়ক, বিশেষজ্ঞ উদ্ধৱ চন্দ্ৰ শৰ্মাই ‘সংকট আৰু প্ৰত্যাৱৰ্তন – ভাৰতৰ চাহ উদ্যোগৰ ভৱিষ্যৎ’ -শীৰ্ষক বক্তৃতা প্ৰদান কৰি এই মন্তব্য প্ৰদান কৰে। ডিব্ৰুগড় প্ৰেছ ক্লাবে তেওঁলোকৰ ‘আমাৰ আলহী’ শৃংখলাৰ অধীনত ডিব্ৰুগড়ৰ ডি আৰ ডি এ কমপ্লেক্সৰ জাগৃতি প্ৰেক্ষাগৃহত আজি এই অনুষ্ঠানৰ আয়োজন কৰিছিল। শীৰ্ষস্থানীয় চাহ উৎপাদনকাৰী কোম্পানী ৱাৰেন টি লিমিটেডৰ কাৰ্য্যবাহী সঞ্চালক হিচাপে অৱসৰ গ্ৰহণ কৰা শৰ্মাই কয় যে চাহ উদ্যোগ, বিশেষকৈ অসমৰ দুশ বছৰীয়া পুৰণি চাহ উদ্যোগ আজি বাগিচাৰ পৰা নিলামলৈ আৰু উৎপাদনৰ পৰা বিপণনলৈকে বিবিধ ক্ষেত্ৰৰ পৰা প্ৰত্যাহ্বানৰ সন্মুখীন হৈছে। তথাপি এনে নহয় যে উদ্যোগটোৱে প্ৰত্যাৱৰ্তন কৰিব নোৱাৰে, ইয়াৰ বাবে সকলো অংশীদাৰ আৰু টি ব’ৰ্ড তথা কেন্দ্ৰীয় আৰু চাহ উৎপাদনকাৰী ৰাজ্য চৰকাৰৰ পৰা এক শক্তিশালী সামগ্ৰিক দৃষ্টিভংগীৰ প্ৰয়োজন বুলি তেখেতে উল্লেখ কৰে। ভাৰতত চাহৰ ব্যৱহাৰ কম। চাহৰ কম শতাংশ ব্যৱহাৰক লৈ উদ্বেগ প্ৰকাশ কৰি শৰ্মাই কয় যে দেশৰ জনসাধাৰণৰ মাজত, বিশেষকৈ যুৱ প্ৰজন্মৰ মাজত চাহৰ ব্যৱহাৰ বৃদ্ধি কৰাৰ জৰুৰী প্ৰয়োজন আছে। শৰ্মাই প্ৰজেক্টৰৰ জৰিয়তে বৰ্তমান অসমৰ চাহ উদ্যোগৰ সংকট আৰু প্ৰত্যাৱৰ্তনৰ ওপৰত বিস্তৃতভাৱে ভাষণত বৰ্ণনা কৰে। অনুষ্ঠানত উপস্থিত থাকি প্ৰাক্তন কেন্দ্ৰীয় মন্ত্ৰী আৰু অসম চাহ মজদুৰ সংঘৰ সভাপতি পৱন সিং ঘটোৱাৰে কয় যে চাহ উদ্যোগক জীয়াই তুলিবলৈ চৰকাৰৰ কৰণীয় বহুত আছে। সময় থাকোঁতেই চৰকাৰে ব্যৱস্থা গ্ৰহণ নকৰিলে অসমত এক ভয়ংকৰ পৰিস্থিতিৰ সৃষ্টি হব পাৰে। বৰ্তমান অসমৰ কেঁচা চাহপাতৰ সমস্যা, ক্ষুদ্ৰ চাহ খেতিয়কৰ সমস্যাক লৈ ভাৰতীয় চাহ বৰ্ডৰ ভূমিকা পুতৌজনক বুলি ঘটোৱাৰে অভিহিত কৰে । উপস্থিত চাহ বিশেষজ্ঞ অমিতাভ ফুকনেও চাহ উদ্যোগৰ বিভিন্ন সমস্যাৰ ওপৰত আলোকপাত কৰে।, অসম চাহ কৰ্মচাৰী সংঘ (এচিকেএছ)ৰ সাধাৰণ সম্পাদক ৰিষভ কলিতাই চাহ উদ্যোগৰ উন্নয়নৰ বাবে এক সুকীয়া মন্ত্ৰণালয়ৰ পোষকতা কৰে। অনুষ্ঠানত অসম ৰাজ্যিক ভাৰতীয় চাহ মজদুৰ সংঘৰ সভাপতি অশোক ওৰাং, ক্ষুদ্ৰ চাহ খেতিয়ক, আছা, এটিটিএছএৰ প্ৰতিনিধি, ডিব্ৰুগড় বিশ্ববিদ্যালয়ৰ চাহ প্ৰযুক্তিবিদ্যা বিভাগৰ ছাত্ৰ-ছাত্ৰী, গণমাধ্যমকৰ্মী আৰু বিভিন্ন ক্ষেত্ৰৰলোক এই অনুষ্ঠানত উপস্থিত থাকে। বক্তৃতাৰ পিছত এক প্ৰশ্ন উত্তৰ শিতানত শৰ্মাই অংশগ্ৰহণ কৰে। এই অনুষ্ঠানত সভাপতিত্ব কৰে ডিব্ৰুগড় প্ৰেছ ক্লাবৰ সভাপতি , জ্যেষ্ঠ সাংবাদিক মানস জ্যোতি দত্তই আৰু আঁত ধৰে সাধাৰণ সম্পাদক ৰিপুঞ্জয় দাসে।