ছ’চাইটি ফৰ শ্ৰীমন্ত শংকৰদেৱৰ ৱেবছাইট পুনৰ নিৰ্মাণ

ৰঙিলী বাৰ্ত্তাসেৱা-  ছ’চাইটি ফৰ শ্ৰীমন্ত শংকৰদেৱৰ অফিচিয়েল ৱেবছাইট www.sankaradeva.com ক নতুনকৈ সজাই তোলা হৈছে। এই নতুন ডিজাইনটো কৰিছে ৱেবছাইটটোৰ পৰিচালক, নতুন দিল্লীস্থ বিশিষ্ট ৱেব-ডিজাইনাৰ অসীম দত্তই। ৱেবছাইটটোত শ্ৰীমন্ত শংকৰদেৱৰ বিষয়ে বহুতো মূল্যৱান প্ৰবন্ধ আৰু তেওঁৰ সৃষ্ট পৰম্পৰাৰ সৈতে জড়িত ভিডিঅ’ আছে। ইয়াত সন্নিবিষ্ট মূল্যৱান গৱেষণাভিত্তিক প্ৰবন্ধসমূহৰ বাবে সমগ্ৰ বিশ্বৰ অসংখ্য গৱেষকে ইয়াৰ উল্লেখ কৰিছে। এইদৰে এই অনলাইন প্লেটফৰ্মে শ্ৰীমন্ত শংকৰদেৱৰ জীৱন আৰু কৰ্মৰ বিষয়ে বিশ্বজুৰি জ্ঞান প্ৰচাৰত সহায় কৰিছে। ইয়াক প্ৰথমে চৈধ্য বছৰ আগতে ২০১২ চনৰ জানুৱাৰী মাহত এক বৰ্ণাঢ্য অনুষ্ঠানত মুকলি কৰা হৈছিল।

নতুনকৈ ডিজাইন কৰা ফৰ্মেটত ৱেবছাইটটোত এটা নতুন পৃষ্ঠা সংযোজন কৰা হৈছে, য’ত শ্ৰীমন্ত শংকৰদেৱৰ বিষয়ে গ্ৰন্থৰ তালিকা উপস্থাপন কৰা হৈছে। ছ’চাইটিৰ সভাপতি ড০ সঞ্জীৱ কুমাৰ বৰকাকতী, সম্পাদক মৃদু মৌচম বৰা, সমন্বয়ক প্ৰদীপ হাজৰিকা, প্ৰচাৰ সম্পাদক ড০ বুলজিৎ বুঢ়াগোহাঁই, ৱেব এডমিন অসীম দত্ত আদিৰে গঠিত এটা বলিষ্ঠ দল আছে। ৱেবছাইটৰ বিষয়বস্তু ড° সঞ্জীৱ কুমাৰ বৰকাকতীয়ে ব্যক্তিগতভাৱে তত্বাৱধান কৰে। ডিজিটেল কামত বাবুল গগৈয়েও সহায় কৰিছে।

ৱেবছাইটটোত অধ্যাপক বীৰেন্দ্ৰ কৃষ্ণ অলংকাৰ, ড° পোনা মহন্ত, ড° মল্লিকা কন্দলী, ড° সঞ্জীৱ কুমাৰ বৰকাকতী, ৰোহিত ভেংকটেশ্বৰন, ড° পবিত্ৰপ্ৰাণ গোস্বামী, ড° মদন শৰ্মা, ড° আৰ্শিয়া ছেঠী, ড° অনন্য বৰুৱা, সঞ্জীৱ সভাপণ্ডিত, হৰিপ্ৰসাদ হাজৰিকা, ৰূপম কুমাৰ বড়ো ইত্যাদিৰ মূল্যৱান প্ৰবন্ধ আছে। ইয়াত এটা যোগাযোগৰ পৃষ্ঠাও আছে, য’ত যিকোনো ব্যক্তিয়ে ছ’চাইটিৰ লগত যোগাযোগ কৰিব পাৰে।