গড়ভঙাত বিনামূলীয়া স্বাস্থ্য শিবিৰ
ৰঙিলী বাৰ্ত্তাসেৱা- গুৱাহাটীৰ বিৰুবাৰীস্থিত ৰামকৃষ্ণ মিচন আশ্ৰমৰ উদ্যোগত আৰু গড়ভঙা পাৰিজাত একাডেমীৰ সহযোগত গুৱাহাটীৰ সমীপৱৰ্তী বৃহত্তৰ গড়ভঙা অঞ্চলটোক সামৰি এটি বিনামূলীয়া স্বাস্থ্য পৰীক্ষা আৰু স্বাস্থ্য সজাগতা শিবিৰৰ আয়োজন কৰা হয়। দুগৰাকী বিশেষজ্ঞ চিকিৎসকৰ উপস্থিতিৰে অনুষ্ঠিত হোৱা শিবিৰটোলৈ শিশু, যুবা, বৃদ্ধ সমন্বিতে এশজন পৰামৰ্শ গ্ৰহণকাৰী ব্যক্তিৰ আগমন ঘটে। শিবিৰত চিকিৎসা সম্পৰ্কীয় পৰামৰ্শৰ উপৰিও বিনামূলীয়া ঔষধৰ যোগান ধৰা হয়। ৰামকৃষ্ণ মিচনৰ তৰফৰ পৰা কল্যাণকামী আঁচনিৰ আধাৰত সকলোকে একোখনি বস্ত্ৰ ,স্বাস্থ্যৰ প্ৰতি যত্নৰ প্ৰতীক স্বৰূপে একোটিকৈ টুথপেস্ট আৰু কিছু খাদ্য সামগ্রী বিতৰণ কৰা হয়। শিবিৰ সুকলমে অনুষ্ঠিত কৰাৰ ক্ষেত্ৰত গড়ভঙা পাৰিজাত একাডেমীৰ সমন্বয়ক আৰু প্ৰধান শিক্ষক ক্ৰমে ধৰ্ম কান্ত কলিতা আৰু প্ৰকাশ শৰ্মাই সক্ৰিয় সহযোগ আগবঢ়ায়। শিবিৰৰ বাবে প্ৰয়োজনীয় আচবাব যোগান ধৰাৰ উপৰি বিদ্যালয়ৰ তৰফৰ পৰা শিবিৰলৈ আগমন ঘটা সকলো ব্যক্তিৰ বাবে দুপৰীয়াৰ আহাৰৰ ব্যৱস্থা কৰা হয়। শিবিৰৰ অন্তত স্থানীয় লোক সকলৰ মাধ্যমত অঞ্চলটোৰ আৰ্থ-সামাজিক দিশৰ বুজ লোৱা হয়। শিবিৰটোৰ সফলতাত মিঢনৰ কৰ্মকৰ্তা সকল অতি উৎসাহিত হয় আৰু ভৱিষ্যতে এনে শিবিৰ অঞ্চলটোত নিয়মীয়াকৈ অনুষ্ঠিত কৰাৰ বাবে গাঁওবাসীক আশ্বাস প্ৰদান কৰে।