কুলশী নদীত অবৈধ বালি খননত জড়িত বনবিষয়া,কৰ্মচাৰী
কুলশী নদীৰ অৱক্ষয় আৰু শিহুৰ বাসস্থান হেৰুওৱাক লৈ চিন্তিত প্রকৃতিপ্রেমী সংগঠন
মিৰ্জা,ৰঙিলী বাৰ্ত্তাসেৱা- বন্যপ্রাণী সংৰক্ষণ ১৯৭২ বাইল্ড লাইফ প্রটেকচন এক্টক একাষৰীয়া কৰি একাংশ বালি ব্যবসায়ীয়ে নিতৌ যুদ্ধংদেহীভাৱে অসমৰ ভিতৰত লেখত ল’বলগীয়া দক্ষিণ কামৰূপৰ কুলশী নদীত বালি খনন কৰাৰ ফলত কুলশী নদী আজি অৱক্ষয়ৰ গৰাহত পৰে। জানিব পৰামতে, বাইল্ড লাইফ প্রটেকচন এক্ট ১৯৭২ মতে সংক্ষিত বনাঞ্চলত বালি উঠোৱাৰ বাবে বন আইন ১৯৮৬ ৰ মতে ভাৰত চৰকাৰৰ এমঅইএফ অর্থাৎ মিনিষ্টি অৱ এনভাইৰোমেন্ট এণ্ড ফৰেষ্টাৰ অনুমতিৰ প্রয়োজন। ইয়াৰোপৰি ৰিভাৰ ডলফিন তথা নদী শিহুৰ বিচৰণস্থলীত বালি উঠোবাব কাৰণে ডব্লিউ আই আই অর্থাৎ বাইল্ড লাইফ ইনষ্টিটিউত অৱ ইণ্ডিয়াৰ অনুমতি ল’ব লাগে। কিন্তু এই নীতি নিয়ম তথা আইনক ভৰিৰে মোহাৰি পশ্চিম কামৰূপ বন সংমণ্ডলৰ কুলশী নদীত বালি ব্যৱসায়ীয়ে নির্বিঘ্নে চলাই গৈছে বালিৰ এখন ৰমৰমীয়া ব্যৱসায়। ফলত কুলশী নদী ক্রমাত শুকাই যোৱাই নহয় ৰিভাৰ দলফিনৰ প্রতি ভাবুকি আহি পৰিছে। যোৱা কেইবা বছৰৰ ভিতৰত স্কুলশী নদীত বহু কেইটা শিহুৱে মৃত্যুমুখত পৰে। কিন্তু এই সকলো কার্যকলাপ সন্দৰ্ভত চৰকাৰ বা বন বিভাগে কোনো ব্যৱস্থা গ্রহণ কৰিবলৈ সক্ষম হোৱা নাই। লগতে কুলশী নদীত শিহুৰ বিচৰণস্থলীত সন্দৰ্ভত শেহতীয়াভাৱে মহামান্য আদালতত চলি থকা এটি কেছত এই ঘটনাৰ স্বৰূপ ওলাই পৰে। ইয়াৰ মাজতে অবৈধ বালি খননত কুলশী নদীৰ অৱক্ষয় আৰু শিহুৰ বাসস্থান হেৰুওৱাক লৈ ৰাজ্যসভাত প্রশ্ন উত্থাপন কৰিছিল সাংসদ অজিত কুমাৰ ভূঞাই। কুলশী নদীত অবৈধ বালি খনন কৰাৰ ফলত যে এই কুলশী নদীৰ লগতে তাত থকা আপুৰুগীয়া সম্পদ বিভাৰ ডলফিন তথা নদী শিহুৰ আজি বিপর্যয় হৈছে তাক তেওঁ সবিস্তাৰে সদনত উত্থাপন কৰিছিল। নদীখনৰ পৰিবেশতন্ত্র পুনৰুদ্ধাৰ আৰু শিহুসমূহক সুৰক্ষা প্রদানৰ বাবে কঠোৰ নিষেধাজ্ঞা জাৰীৰ প্রয়োজনীয়তাৰ লগতে যাৱতীয় ব্যৱস্থা গ্রহণ কৰা সন্দর্ভত সংসদৰ শূন্যকালীন ঘণ্টাত বিষয়টো উত্থাপন কৰিছিল। উল্লেখ যে,পশ্চিম কামৰূপ বন সংমণ্ডলটোৰ অন্তর্গত কুলশী, বামুণীগাঁও,লোহাৰঘাট আদি ঠাইত দুই-এটিহে বৈধ বালি মহল থকাৰ অভিযোগ উত্থাপন হৈ অহাৰ পিচতো সংমণ্ডলটোত দিনে-নিশাই ক’ৰপৰা বালিভর্তি বাহনৰ দৌৰাত্ম্য অব্যাহত থাকে তাক লৈ সচেতন লোকে প্রশ্ন উত্থাপন কৰিছে। এই বালি সৰবৰাহ কৰাৰ ক্ষেত্ৰত অধিকাংশ বালিভর্তি বাহনত নাথাকে বিভাগীয় অনুমতি তথা চালান। এইক্ষেত্ৰত ৰাজ্যৰ মুখ্যমন্ত্রী ড. হিমন্ত বিশ্ব শর্মাই বনবিভাগৰ দায়িত্বত থকা বালিৰ বিষয়টো তেওঁৰ আওতালৈ নিব বুলি ঘোষণা আগবঢ়াইছিল যদিও বিশেষ সুফল নাপালে। বন আইনমতে এই শিহু বিচৰণ কৰাস্থলীত বালি উঠোৱা নিষেধ। তেনেক্ষেত্রত কিন্তু কুলশী নদীৰ ঠায়ে ঠায়ে আনকি মেচিন লগাইয়ো বালি তুলি থকা কার্যই সচেতন লোকৰ চকু কপালত তুলিছে। আনকি এই বালিভর্তি বাহনৰ দৌৰাত্ম্যৰ বাবে একাংশই আঁকালতে প্রাণ দিবলগীয়া ঘটনা সংঘটিত হৈছে। গুৰুত্বপূৰ্ণ কথা যে বৃট্টিছৰ শাসনকালৰে পৰা প্রৱর্তন হোৱা বন আইনখন সংশোধনৰ দাবী তুলি সাতামপুৰুষীয়া মহলদাৰী প্ৰথাৰো অৱসানৰ দাবীৰে দক্ষিণ কামৰূপ বালি ব্যৱসায়ী সন্থাই তেতিয়াৰ বনমন্ত্রী প্রমীলাৰাণী ব্ৰহ্মক চালানৰ জড়িয়তে বালি সৰবৰাহ কৰাৰ দাবী জনাইছিল। মুখ্যমন্ত্রী সর্বানন্দ সোণোৱালৰ সৈতেও সন্থাই কেইবাবাৰো মিলিত হৈছিল। একাংশ বালি ব্যবসায়ীয়ে প্রয়োজন অনুপাতে বিভাগটোৰ পৰা চালান সংগ্ৰহ কৰিব নোৱৱাৰ বাবেও দক্ষিণ কামৰূপত চলি আহিছে অবৈধ বালিৰ এখন ব্যবসায়। ইপিনে ৰাজ্যৰ পৰিবহন বিভাগৰ হস্তক্ষেপত বিভাগটোৰ নাম লৈ দক্ষিণ কামৰূপৰ দুই এঠাইত বালিৰ ট্ৰাকৰ পৰা গোপনে ধন সংগ্ৰহ কৰি অহাৰো অভিযোগ উত্থাপিত হৈছে। এই গোপন ধন সংগ্ৰহৰ পৰা আকৌ আৰক্ষী প্ৰশাসনৰ হাতলৈও যায় ধন। এইক্ষেত্ৰত দক্ষিণ কামৰূপৰ এই বালিৰ ব্যবসায়খন বৈধ কৰি তুলিলে নিতৌ প্রায় ১৬০০-১৭০০ খন বালিভর্তি বাহনৰ পৰা চৰকাৰে পাবলগীয়া বাজহৰ পৰিমাণ বৃদ্ধি পাব বুলি উল্লেখ কৰে। অবশ্যে বৈধভাৱে বালি সৰবৰাহ কৰিলে জিলা প্রশাসন,পৰিবহণ বিভাগ আৰু বাজহ চক্র বিষয়া, স্থানীয় আৰক্ষী বিভাগ, বনবিভাগৰ বিষয়া কর্মচাৰীসকলে মাহিলি কমিচন সংগ্রহৰপৰা বঞ্চিত হ’বলগীয়া হোৱাৰো অভিযোগ আহে। ফলত এই ব্যৱসায়খন বৈধৰূপত চলাতো কোনো এটি বিভাগে নিবিচাৰে। বালিৰ ঘাটতে চালান দিয়াৰ ব্যৱস্থা কৰিবলৈও চৰকাৰক আহ্বান জনায় নিয়মত চলা একাংশ ব্যবসায়ীয়ে। মুঠতে বন বিভাগ,আৰক্ষী প্রশাসন, ৰাজহ চক্র বিষয়াকে ধৰি পৰিৱহণ বিভাগক মেনেজ কৰি একাংশ ব্যৱসায়ীয়ে দক্ষিণ কামৰূপত বালিৰ এখন অবৈধ ব্যৱসায় চলাই যাবলৈ সক্ষম হৈছে।