এডভান্টেজ আছাম ২.০ৰ বাবে হায়দৰাবাদত মন্ত্রী ডাঃ ৰণোজ পেণ্ডৰ ৰোড শ্ব’
ৰঙিলী বাৰ্ত্তাসেৱা- এডভান্টেজ আছাম ২.০বিনিয়োগকাৰীক আকৰ্ষিত কৰাৰ বাবে হায়দৰাবাদত এক ৰোড শ্ব’ত অংশগ্ৰহণ কৰে শিক্ষামন্ত্রী ডাঃ ৰণোজ পেগুৱে ।মন্ত্রী ডাঃ ৰণোজ পেগুৱে অসমৰ অৰ্থনৈতিক পৰিৱৰ্তন আৰু ইয়াত বিনিয়োগকাৰী অনুকূল নীতিৰ ওপৰত আলোকপাত কৰি বিভিন্ন খণ্ডৰ পৰা বিনিয়োগৰ বাবে আমন্ত্রণ জনায়। ৰোড শ্ব’ত মন্ত্রী ডাঃ ৰণোজ পেগুৱে কয় যে ইতিমধ্যে অসমৰ সম্ভাৱনাৰ প্ৰতি ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ৰ পৰা যথেষ্ট আগ্রহ দেখিবলৈ পাইছোঁ। হায়দৰাবাদৰ ৰোড শ্ব’ই এই গতি অব্যাহত ৰাখিব, যিয়ে অসমৰ যাত্ৰাক শীর্ষ বিনিয়োগৰ গন্তব্য স্থান হিচাপে গঢ় দিয়াত সহায় কৰিব। যোগাযোগ, আন্তঃগাঁথনি, ঔদ্যোগিক উন্নয়নৰ ক্ষেত্ৰত নিজকে নতুনকৈ সংজ্ঞায়িত কৰি অসমে শেহতীয়া বছৰবোৰত এক উল্লেখযোগ্য পৰিৱৰ্তন সাধন কৰিছে। মন্ত্ৰী ডাঃ ৰণোজ পেগুৱে শিক্ষাখণ্ডত বৈপ্লৱিক পৰিৱৰ্তন আনিবলৈ প্রযুক্তি শক্তিক ব্যৱহাৰ কৰাৰ বিষয়ে উল্লেখ কৰি কয় যে বিদ্যালয়সমূহৰ বাবে এটা এআইচালিত পৰিচালনা ব্যৱস্থা প্ৰৱৰ্তন কৰা হৈছে, যিয়ে প্রতিজন ছাত্ৰৰ প্ৰদৰ্শনৰ ওপৰত বাস্তৱ সময়ৰ আপডেট সক্ষম কৰে আৰু শিক্ষক-অভিভাৱকৰ মাজত যোগাযোগ ৰক্ষা কৰে। শৈক্ষিক পৰিৱেশৰ পুনৰ গঠনৰ প্ৰতি আমাৰ দায়বদ্ধতা বিনিয়োগৰ জৰিয়তে স্পষ্ট হৈছে। ৰাজ্যখনত চিকিৎসা আৰু অভিযান্ত্রিক মহাবিদ্যালয়ৰ সংখ্যা বৃদ্ধি কৰা হৈছে। ২০২৬-২৭ চনৰ ভিতৰত আৰু অধিক প্রতিষ্ঠান মুকলি হ’ব। বিজ্ঞান আৰু প্ৰযুক্তিৰ বাবে এখন বিশ্ববিদ্যালয় ইতিমধ্যে আৰম্ভ কৰা হৈছে। এআই আৰু এমএলৰ দৰে নতুন যুগৰ প্ৰযুক্তিৰ ওপৰত মনোনিৱেশ কৰা আন এখন বিশ্ববিদ্যালয়ো আৰম্ভ কৰা হ’ব আৰু এই বিশ্ববিদ্যালয়খন অতি সোনকালে কার্যক্ষম হ’ব। মন্ত্রী ডাঃ ৰণোজ পেগুৱে আৰু কয় যে যোৱা দশকত ৰাজ্যখনৰ ২৫ শতাংশ জনসংখ্যাক বহুমাত্রিক দৰিদ্ৰতাৰ পৰা উলিয়াই আনি স্থায়ী অগ্ৰগতিৰ এক শক্তিশালী ভেটি স্থাপন কৰা হৈছে। অসমত দ্রুতগতিত ঔদ্যোগিক বৃদ্ধি হৈছে। সেয়ে উদ্যোগীসকলক পূব ভাৰত বিশেষকৈ অসমৰ সুযোগসমূহ অন্বেষণ কৰিবলৈ এডভান্টেজ আছাম ২.০ত অংশগ্ৰহণ কৰিবলৈ আমন্ত্রণ জনাই মন্ত্রী ডাঃ ৰণোজ পেগুৱে কয় যে অসম চৰকাৰে ছাত্র-ছাত্রীক দক্ষতা প্রদান আৰু নিয়োগযোগ্য কৰ্মশক্তিৰ সৃষ্টিৰ বাবে ইতিমধ্যে অসম দক্ষতা বিশ্ববিদ্যালয়ো প্রতিষ্ঠা কৰিছে। দক্ষ জনশক্তিৰ অবিৰত যোগান সুনিশ্চিত কৰি ৰাজ্যখনত বিনিয়োগ কৰিবলৈ সাজু হোৱাসকলক চৰকাৰ প্ৰতিশ্রুতিবদ্ধ। হায়দৰাবাদত হোৱা এই ৰোড শ্ব’ত ৰাজ্য চৰকাৰৰ অতিৰিক্ত মুখ্য সচিব ড° বি কল্যাণ চক্রবর্তীয়ে পর্যটন খণ্ডত থকা বিনিয়োগৰ সুবিধাৰ ওপৰত আলোকপাত কৰে।