উত্তৰকাশীৰ ধৰালীত ডাৱৰ বিস্ফোৰণ
ৰঙিলী বাৰ্ত্তাসেৱা- উত্তৰাখণ্ডৰ উত্তৰকাশী জিলাত ধৰালী অঞ্চলত ভয়ংকৰ ডাৱৰ বিস্ফোৰণৰ ফলত সৃষ্টি হোৱা বানপানীয়ে ব্যাপক ধ্বংসলীলা চলাইছে। এই বিপৰ্যয়ত কমেও চাৰিজন লোকৰ মৃত্যু হোৱাৰ উপৰিও প্ৰায় ৫০ জন লোক নিৰুদ্দেশ হোৱাৰ খবৰ পোৱা গৈছে। খীৰ গঙা নদীৰ উপত্যকাত সংঘটিত এই ডাৱৰ বিস্ফোৰণৰ ফলত পানীৰ সৈতে মাটি আৰু ধ্বংসাৱশেষৰ সোঁত বৈ আহি গাঁওখনৰ বহু ঘৰ, হোটেল আৰু হোমষ্টে’ ধ্বংস কৰি পেলাইছে। গংগোত্ৰী তীর্থযাত্ৰাৰ পথত অৱস্থিত ধৰালী এটা প্রধান ষ্টপ-অভাৰ, য’ত বহুতো হোটেল আৰু হোমষ্টে’ আছে। উদ্ধাৰ অভিযানৰ বাবে জিলা প্রশাসন, এছডিআৰএফ (ৰাজ্যিক বিপর্যয় সঁহাৰি বাহিনী), এনডিআৰএফ (ৰাষ্ট্ৰীয় বিপৰ্যয় সঁহাৰি বাহিনী), ভাৰতীয় সেনা আৰু আইটিবিপি (ইণ্ডো-টিবেটান বৰ্ডাৰ পুলিচ) ৰ দলসমূহ ঘটনাস্থলীত উপস্থিত হৈছে। ভাৰতীয় সেনাৰ হাৰ্চিলৰ পৰা ১৫০জনীয়া এটা দল ঘটনাৰ ১০ মিনিটৰ ভিতৰত ঘটনাস্থলীত উপনীত হৈছে আৰু ইতিমধ্যে ১৫-২০জনক উদ্ধাৰ কৰিছে। আহতসকলক হাৰ্চিলৰ সেনাৰ চিকিৎসা কেন্দ্রত চিকিৎসা প্রদান কৰা হৈছে। আইটিবিপিৰ ১৬ জনীয়া এটা দলৰ লগতে এনডিআৰএফৰ তিনিটা দল মানেৰা, বাটকোট আৰু দেৰাদুনৰ পৰা পঠিওৱা হৈছে, আৰু অতিৰিক্ত দুটা দল যুদ্ধ বিমান ঘাটিত বিমানযোগে পঠোৱাৰ বাবে সাজু হৈ আছে। প্রধানমন্ত্রী নৰেন্দ্ৰ মোদীয়ে উত্তৰাখণ্ডৰ মুখ্যমন্ত্ৰী পুষ্কৰ সিং ধামীৰ সৈতে কথা পাতি পৰিস্থিতিৰ বিষয়ে তথ্য লৈছে আৰু ক্ষতিগ্রস্তসকলৰ প্ৰতি সমবেদনা জ্ঞাপন কৰিছে। কেন্দ্রীয় গৃহমন্ত্রী অমিত শ্বাহেও মুখ্যমন্ত্রী ধামীৰ সৈতে যোগাযোগ কৰি উদ্ধাৰ অভিযানৰ বাবে কেন্দ্ৰৰ সকলো ধৰণৰ সহায়ৰ আশ্বাস দিছে। তেওঁ জানিবলৈ দিছে যে আইটিবিপিৰ তিনিটা দল আৰু এনডিআৰএফৰ চাৰিটা দল ঘটনাস্থলীৰ বাবে ৰাওনা হৈছে। উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে এই ঘটনাক অত্যন্ত দুঃখজনক আৰু বেদনাদায়ক বুলি বর্ণনা কৰিছে। তেওঁ সামাজিক মাধ্যমত পোষ্ট কৰি কয়, “ধৰালী (উত্তৰকাশী) অঞ্চলত ডাৱৰ বিস্ফোৰণৰ ফলত হোৱা ভয়ংকৰ ক্ষতিৰ খবৰ অত্যন্ত দুঃখজনক আৰু হৃদয়বিদাৰক। এছডিআৰএফ, এনডিআৰএফ, জিলা প্রশাসন আৰু অন্যান্য সংশ্লিষ্ট দলসমূহ যুদ্ধকালীন ভিত্তিত উদ্ধাৰ আৰু ত্রাণ কার্যত নিয়োজিত হৈছে। মই জ্যেষ্ঠ বিষয়াসকলৰ সৈতে নিৰন্তৰ যোগাযোগত আছো আৰু পৰিস্থিতি নিবিড়ভাৱে পৰ্যবেক্ষণ কৰা হৈছে। মই সকলোৰে সুৰক্ষাৰ বাবে ঈশ্বৰৰ ওচৰত প্ৰাৰ্থনা কৰিছো।” ভাৰতীয় বতৰ বিজ্ঞান বিভাগে উত্তৰাখণ্ডত, বিশেষকৈ পাহাৰীয় অঞ্চলত, ১০ আগষ্টলৈকে তীব্ৰ বৰষুণৰ সতর্কতা জাৰি কৰিছে। বৰষুণৰ ফলত উদ্ধাৰ অভিযানত বাধাৰ সৃষ্টি হৈছে, আৰু প্ৰশাসনে লোকসকলক নিৰাপদ স্থানলৈ স্থানান্তৰিত হ’বলৈ নিৰ্দেশ দিছে।