আমেৰিকাৰ মাজ আকাশত যাত্ৰীবাহী বিমান আৰু সেনাৰ হেলিকপ্টাৰ মাজত সংঘৰ্ষ
ৰঙিলী বাৰ্ত্তাসেৱা- আমেৰিকা যুক্তৰাষ্ট্ৰত এক ভয়াৱহ বিমান দুৰ্ঘটনা ৷ মাৰ্কিন যুক্তৰাষ্ট্ৰৰ ৱাশ্বিংটন ডিচিত মাজ আকাশত যাত্ৰীবাহী বিমানৰ সৈতে মাৰ্কিন সেনাৰ এখন হেলিকপ্টাৰৰ খুন্দা খোৱাত এই ভয়ংকৰ দুৰ্ঘটনা সংঘটিত হয়।দুৰ্ঘটনাৰ পাছত বিমান আৰু হেলিকপ্টাৰখন পট’মেক নদীত পৰি যায়। জানিব পৰা মতে, বিমানখনত যাত্ৰী আৰু ক্ৰু মেম্বাৰসহ ৬৪ জন লোক কঢ়িয়াই নিয়াৰ বিপৰীতে দুৰ্ঘটনা সংঘটিত হোৱাৰ সময়ত হেলিকপ্টাৰখনত তিনিজন লোক আছিল। ঘটনাত এতিয়ালৈকে প্ৰকৃততে কিমানৰ মৃত্যু হৈছে সেয়া স্পষ্ট নহয় যদিও ১৮ জনৰ মৃতদেহ উদ্ধাৰ কৰিছে। বাকীসকলৰ উদ্ধাৰৰ বাবে উদ্ধাৰকাৰীয়ে অভিযান অব্যাহত ৰাখিছে। ইতিমধ্যে সামাজিক মাধ্যমতো ভাইৰেল হৈ পৰিছে এই দুৰ্ঘটনাৰ দৃশ্য।আমেৰিকান এয়াৰলাইনছে এক বিবৃতিত কয়, “উইচিটা, কানছাছৰ (আইচিটি) পৰা ৱাশ্বিংটন, ডিচি (ডিচিএ)লৈ যোৱা আমেৰিকান ঈগল ফ্লাইট ৫৩৪২ ডিচিএত এটা দুৰ্ঘটনাত পতিত হৈছে। বিমানখনত ৬০ জন যাত্ৰী আৰু চাৰিজন কৰ্মচাৰী আছিল।” দেশখনৰ ফেডাৰেল এভিয়েশ্যন এডমিনিষ্ট্ৰেশ্যনে জনায় যে স্থানীয় সময় অনুসৰি নিশা প্ৰায় ৯ বজাত, কানছাছৰ উইচিটাৰ পৰা যাত্ৰা কৰা এখন বিমান ৰানৱেৰ দিশে আহি থকাৰ সময়ত এখন সামৰিক ব্লেকহক হেলিকপ্টাৰৰ সৈতে সংঘৰ্ষত পতিত হয়। এই দুৰ্ঘটনাৰ পাছতো শোক প্ৰকাশ কৰিছে ৰাষ্ট্ৰপতি ড’নাল্ড ট্ৰাম্পে। তেওঁ এক শোকবাৰ্তাত নিহতৰ আত্মাৰ শান্তি কামনা কৰিছে। প্ৰত্যক্ষদৰ্শীয়ে প্ৰকাশ কৰা মতে নিশা আকাশত হঠাৎ জুই দেখে তেওঁলোকে। প্ৰথমে কি হৈছে সেয়া একো বুজি পোৱা নাছিল যদিও ছাইৰেন বজাৰ শব্দই দুৰ্ঘটনা হোৱাৰ কথা নিশ্চিত কৰিছিল।”লগতে তেওঁ যাত্ৰীসকলৰ সন্দৰ্ভত কয়, “ঈশ্বৰে তেওঁলোকৰ আত্মাৰ মংগল কৰক।”