অসম ৰাজ্যিক নিৰ্বাচনী আয়ুক্ত আলোক কুমাৰৰ সভাপতিত্বত আগন্তুক পঞ্চায়ত নিৰ্বাচনৰ পৰ্যালোচনা সভা

এম্ হাছিম আলী,ডিব্ৰুগড়,ৰঙিলী বাৰ্ত্তাসেৱা- অসম ৰাজ্যিক নিৰ্বাচনী আয়ুক্ত আলোক কুমাৰৰ সভাপতিত্বত আগন্তুক পঞ্চায়ত নিৰ্বাচন সুচাৰুৰূপে অনুষ্ঠিত কৰিব বাবে চলাই থকা যাৱতীয় প্ৰাৰম্ভিক প্ৰস্তুতি সন্দৰ্ভত এখনি গুৰুত্বপূৰ্ণ পৰ্যালোচনা সভা  ডিব্ৰুগড় জিলা আয়ুক্ত কাৰ্যালয়ৰ সভাকক্ষত অনুষ্ঠিত হয়। উক্ত পৰ্যালোচনা সভাত যোৰহাট, মাজুলী, শিৱসাগৰ  আৰু চৰাইদেউ  জিলাৰ পঞ্চায়ত নিৰ্বাচনৰ প্ৰাৰম্ভিক প্ৰস্তুতি সন্দৰ্ভত বিতংভাবে পৰ্যালোচনা কৰা হয়। উল্লেখিত জিলা কেইখনৰ পৰা  অংশগ্ৰহণ কৰা জিলা আয়ুক্তসকলে নিজ নিজ জিলাত পঞ্চায়ত নিৰ্বাচনৰ  উপলক্ষে চলাই থকা প্ৰাৰম্ভিক প্ৰস্তুতি সন্দৰ্ভত যাৱতীয় তথ্য সম্বলিত পাৱাৰ পইণ্ট প্ৰেজেন্টেছন আগবঢ়োৱাৰ লগতে জৰুৰী প্ৰয়োজনীয়তা সমূহৰ বিষয়ে অসম ৰাজ্যিক নিৰ্বাচনী আয়ুক্ত গৰাকীক অৱগত কৰে। সভাত ডিব্ৰুগড়ৰ জিলা আয়ুক্ত  বিক্ৰম কৈৰী, মাজুলীৰ জিলা আয়ুক্ত ৰাতুল পাঠক, চৰাইদেউ  জিলাৰ জিলা আয়ুক্ত ডাঃ নেহা যাদৱ, শিৱসাগৰ  জিলাৰ জিলা আয়ুক্ত আয়ুস গাৰ্গ প্ৰমুখ্যে জিলাকেইখনৰ আৰক্ষী অধীক্ষকসকল, নিৰ্বাচনী বিষয়াসকল আৰু অন্যান্য উচ্চ পদস্থ বিষয়াসকল উপস্থিত থাকে।