অভিনেত্ৰী নন্দিনী কাশ্যপৰ জামিন আবেদন নাকচ গুৱাহাটী উচ্চ ন্যায়ালয়ৰ
ৰঙিলী বাৰ্ত্তাসেৱা- অভিনেত্রী নন্দিনী কাশ্যপ-ৰ জামিন আবেদন নাকচ কৰিলে গুৱাহাটী উচ্চ ন্যায়ালয়ে। যাৰ বাবে তেওঁ পুনৰ কাৰাগাৰতে থাকিব লাগিব। নন্দিনী কাশ্যপক গুৱাহাটী আৰক্ষীয়ে গ্ৰেপ্তাৰ কৰাৰ পিছত আদালতে ন্যায়িক জিম্মা দিয়াৰ পিছত কেন্দ্ৰীয় কাৰাগাৰত ৰাখিছিল। আজি আছিল জামিন আবেদনৰ শুনানি। শুনানিত উচ্চ ন্যায়ালয়ৰ ন্যায়াধীশসকলে গোচৰৰ ডায়েৰী পৰ্যালোচনাৰ বাবে দাবী কৰিছিল, আৰু শুনানিৰ পিছত তেওঁলোকৰ জামিনৰ আবেদন নাকচ কৰা হৈছে। ফলত, নন্দিনী এতিয়া কাৰাগাৰতে থাকিব লাগিব।নিম্ন আদালতত আবেদন কৰাৰ নিৰ্দেশ গুৱাহাটী উচ্চ ন্যায়ালয়ৰ। আজি অনুষ্ঠিত শুনানিত ন্যায়ালয়ে গোচৰৰ তথ্য আৰু ডায়েৰী পৰ্যালোচনা কৰি এই সিদ্ধান্ত গ্রহণ কৰে। নন্দিনী কাশ্যপৰ বিৰুদ্ধে গুৱাহাটীৰ দক্ষিণগাঁৱত ২৫ জুলাইত সংঘটিত এক হিট-এণ্ড-ৰানৰ ঘটনাত জড়িত থকাৰ অভিযোগ উত্থাপিত হৈছে, য’ত ২১ বছৰীয়া ইঞ্জিনীয়াৰিং ছাত্র ছামিউল হকৰ মৃত্যু হৈছিল। নন্দিনী কাশ্যপৰ গাড়ীয়ে ছামিউল হকক আঘাত কৰাৰ পিছত তেওঁ ঘটনাস্থলীৰ পৰা পলায়ন কৰাৰ অভিযোগ উত্থাপিত হৈছে। চিচিটিভি ফুটেজ আৰু প্ৰত্যক্ষদর্শীৰ সাক্ষ্যৰ ভিত্তিত আৰক্ষীয়ে তেওঁক ৩০ জুলাইত গ্ৰেপ্তাৰ কৰে। তেওঁৰ বিৰুদ্ধে ‘হত্যা নহয় কিন্তু দোষী হত্যা’ (culpable homicide not amounting to murder) আৰু ‘হিট-এণ্ড-ৰান’ৰ অভিযোগ অনা হৈছে। ঘটনাৰ পিছত ছামিউল হকক প্রথমে গুৱাহাটী মেডিকেল কলেজ হাস্পতালত ভৰ্তি কৰা হৈছিল, কিন্তু পিছত তেওঁক এখন ব্যক্তিগত হাস্পতাললৈ স্থানান্তৰ কৰা হয়, য’ত চাৰি দিনৰ পিছত ২৯ জুলাইত তেওঁৰ মৃত্যু হয়। এই গোচৰ তদন্ত এতিয়াও চলি আছে, আৰু আৰক্ষীয়ে অধিক তথ্য সংগ্ৰহৰ বাবে কাম কৰি আছে।