হাজোত বলেৰ’ পিক আপ ভান চুৰি
অক্ষয় মেধি,হাজো, বাৰ্ত্তাসেৱা- ক্ৰমশঃ চোৰ-ডকাইতৰ ৰম্যভূমিলৈ পৰ্যবসিত তীৰ্থ নগৰী হাজোত কালি নিশা বলেৰ’ পিক আপ ভান এখন চুৰি হোৱা ঘটনাই জনসাধাৰণৰ মাজত প্ৰতিক্ৰিয়াৰ সৃষ্টি কৰে ।জানিব পৰা মতে হাজো আৰক্ষী থানাৰ অন্তৰ্গত নতুন চোৰাবড়ীৰ চুলতান আলীয়ে নিজৰ এ এছ-০১-জি চি ৩৯৮৯ নম্বৰৰ বলেৰ’ পিক আপ ভান খন অইন দিনাৰ নিচিনা যোৱা কালিও ব্যৱসায় কৰি আহি নিজ গৃহৰ চৌহদত থৈছিল। ৰাতিপূৱা চাৰি মান বজাত শুই উঠি গাড়ীৰ গৰাকী চুলতান আলীয়ে ঘৰৰ চৌহদত গাড়ীখন নেদেখি চিঞৰি-বাখৰ লগাই যদিও নিশা কোনো দুৰ্বৃত্তই গাড়ীখন চুৰি কৰি নিয়া বুলি নিশ্চিত হয় । উপায়ন্তৰ হৈ গাড়ীৰ গৰাকী চুলতান আলীয়ে আজি হাজো আৰক্ষীক গাড়ী চুৰি হোৱা সন্দৰ্ভত এজাহাৰ দাখিল কৰে । হাজো আৰক্ষীয়ে এজাহাৰৰ ভিত্তিত এক গোচৰ ৰুজু কৰি গাড়ীখন উদ্ধাৰৰ লগতে চুৰি কাণ্ডত জড়িত দুৰ্বৃত্তক কৰায়ত্ব কৰাৰ বাবে জোৰ তদন্ত আৰম্ভ কৰিছে ।পিছে অদ্যাপিও আৰক্ষীয়ে কোনো সম্ভেদ উলিয়াব পৰা নাই।