মাজুলীৰ ডুখৰীয়া সপোন
শীতৰ পুৱা এটিত ওলাবা বন্ধু
নিমাতীঘাটৰ পৰা
পানচৈ মেলি দিম
হেঁপাহৰ মাজুলীলৈ
সুৰীয়া ঐনিতমৰ সুৰ টানিবলৈ
নিয়ৰসিক্ত শেৱালি সৰা পুৱাটোত
কঁহুৱা ডৰাই শুকুল আঁচল আঁৰিব
সেই আঁচলৰ কাষতে সপোন এটিও জিলিকিব
সোণোৱালী ধাননিৰ
মন আকাশ ভৰাই
আশাত বন্দী হ’ব
হালৰ গৰু,নাঙল,যুঁৱলি আৰু
কেচাঁ মাটিৰ গোন্ধেৰে আমোলমোল পথাৰখনি।
তেনে এখনি
মাজুলীৰ পৰাই আনিম
যান্ত্ৰিকতাৰে ভৰা নগৰবাসীলৈ
এবুকু নিভাঁজ মৰম
ঐনিতমসুৰীয়া আকুলতা
আৰু বুঢ়ালুইত সম বিশাল সৰলতা।
মৃগাংক বৰুৱা