ভালপোৱাৰ দাম
পাৰ্থপ্ৰতীম শৰণীয়া
আজিকালি ভালপোৱাৰ যথেষ্ট দাম
সন্ধিয়া এপেগ দুপেগ কৰি গিলি যোৱা
টনিকখিনি
ৰিফ্ৰেছ হোৱাৰ অজুহাতত জ্বলোৱা
চিগাৰেটটো
বহু সস্তীয়া।
তথাপি মন যায়
কাৰোবাৰ স’তে কোনোবা নিজান ঠাইত
মণিকোঠাৰ অস্ফুট লহৰ বিলাবলে,
নীলিম অসীম আকাশৰ বুকুত
অজস্ৰ মেঘৰ টুকুৰাবোৰ আঙুলিয়াই
দীপ্ত জোনটো দেখুৱাবলে
মোৰো মন যায়,
কিন্তু আজিকালি ভালপোৱাৰ যথেষ্ট দাম।
প্ৰহৰ,প্ৰভাত,নিৰিবিলি জোনাক
আৰু সময়ৰ দুই এটি মোহনা
অবুজন নিসংগতা,
সম্ভৱত তুমি আহি পূৰাবা এই সময়।