ঝাড়ু
সকলোৰে ঘৰত থাকে
আবৰ্জনাবোৰ অঁতাবলৈ
একোটাকৈ ঝাড়ু
বিদ্যালয় হস্পিতাল অফিচ কাছাৰি
উৰাজাহাজ পানীজাহাজ
ৰেলগাড়ী মটৰগাড়ী
সকলোতে থাকে এটা ঝাড়ু
আয়ে কৈছিল বাহী চোতালখন
দেৰীলৈকে নথ’বি
চোতাল সাৰি ঝাড়ুটো পিছফালে থবি
ওলাওঁতে সোমাওঁতে দেখিব নাপায় ।
কথাবোৰে পাক লগায়
বাহী চোতাল সাৰি পবিত্ৰ কৰা ঝাড়ুটো
নিজে অপবিত্ৰ হৈ চুকত পৰি ৰয়
সভাঘৰ নাটঘৰ ৰজাঘৰ প্ৰজাঘৰ
সকলোতে নচলে নহলে ঝাড়ু
মলিয়ণ গোচাবলৈ লাগে মাথোঁ ঝাড়ু
জাবৰবোৰ আহিব ঘূৰি
যদিহে ঝাড়ুৱালাই নধৰে ভালকে মুঠি
আজিকালি ঝাড়ুবোৰ ৰংচঙীয়া
তামোলপাত , নাৰিকলপাতৰ ঝাড়ু
বাঁহৰ ঝাড়ু , ফুল ঝাড়ু
ৰঙা নীলা বহুৰঙী প্লাষ্টিকৰ ঝাড়ু
ৰংচঙীয়া ঝাড়ুবোৰক অপবিত্ৰ বুলি কোৱা নুশুনো
কিছুমানে সমুখৰ ৱালতে ওলোমাই থয়
কিজানি ঝাড়ুটো নষ্ট হয়
সেইসকলে ঝাড়ুক সন্মান কৰে
তেওঁলোকে বুজি পাই —
ঝাড়ুটো নহ’লে পৃথিবীত হ’ব কি
জীৱনৰ অপৰিহাৰ্য্য সামগ্ৰী ই
প্ৰতিটো মলিয়ন পুৱাৰ সোণালী ৰেঙণি ৷
—-হেমা চৌধুৰী গগৈ
গোলাঘাট , ৰঙাজান