মাজুলীৰ প্ৰাথমিক শিক্ষক সন্মিলনী প্ৰাক্তন সভাপতি পৰমানন্দ নাথৰ মৃত্যু
বিকাশ শইকীয়া,মাজুলী,ৰঙিলী বাৰ্ত্তাসেৱা- মাজুলীৰ সোনাৰীআটি গাঁৱৰ নিবাসী অৱসৰপ্ৰাপ্ত প্ৰধান শিক্ষক , মাজুলী জিলা প্ৰাথমিক শিক্ষক সন্মিলনী প্ৰাক্তন সভাপতি , সমাজ সংগঠক , সু- বক্তা , অভিনেতা , পৰিচালক পৰমানন্দ নাথৰ কালি নিশা ৮-৪২ বজাত তেখেতৰ সোণাৰীআটীস্হিত নিজ বাসগৃহত মৃত্যু হয় । ১৯৫৪ চনত জন্ম গ্ৰহণ কৰা পৰমানন্দ নাথে শিক্ষকতা কৰি ২০১৪ চনৰ ডিচেম্বৰ মাহত অৱসৰ গ্ৰহণ কৰিছিল। সমাজৰ আগশাৰীৰ ব্যক্তি হিচাপে তেখেতে মাজুলী জিলা প্ৰাথমিক শিক্ষক সন্মিলনীৰ একাধিকবাৰ সভাপতি আৰু সম্পাদক পদত অধিষ্ঠিত হৈ প্ৰাথমিক বিদ্যালয়ৰ শিক্ষক সকলৰ বিভিন্ন সমস্যা, বিদ্যালয়ৰ শৈক্ষিক সমস্যা সমূহ সমাধান , প্ৰাথমিক কেন্দ্ৰ সভা সমূহ সজীৱ কৰি ৰখাত বলিষ্ঠ পদক্ষেপ গ্ৰহণ কৰিছিল । তাৰোপৰি তেখেত আছিল মাজুলী জিলা যোগী সন্মিলনীৰ সম্পাদক। সেই সময়ত মাজুলী জিলা যোগী সন্মিলনীৰ উদ্যোগত ৰঙাচাহী অঞ্চলত প্ৰতিষ্ঠিত উচ্চ শিক্ষানুষ্ঠান ৰঙাচাহী মহাবিদ্যালয় প্ৰতিষ্ঠাৰ সময়ত তেখেত আছিল যোগী সন্মিলনীৰ সম্পাদক । তেখেত আছিল ৰঙাচাহী নৱজ্যোতি কৃষ্টি সংঘৰ প্ৰতিষ্ঠাপক সভাপতি । সমাজৰ বিশেষ পৰিচিত ব্যক্তি গৰাকীৰ পৰালোকৰ খবৰ বিয়পি পৰাৰ লগে লগে অঞ্চলটোৰ অনেক গুণ মুগ্ধই শেষ শ্ৰদ্ধা নিবেদন কৰে । তেখেতৰ বিয়োগত ৰঙাচাহী অঞ্চলৰ লগতে মাজুলীত শোকৰ ছাঁ পৰিছে। তেখেতৰ বিয়োগত ম্ৰিয়মান হৈ শোক বাৰ্তা প্ৰেৰণ কৰে মাজুলী জিলা যোগী সন্মিলনী সভাপতি গুণকান্ত ভূঞা, সম্পাদক নগেন নাথ, মাজুলী জিলা অন্যান্য পিছপৰা শ্ৰেণীৰ সন্মিলনীৰ সভাপতি আনন্দ নাথ, সাধাৰণ সম্পাদক জীৱন বৰুৱা, মাজুলী জিলা প্ৰাথমিক শিক্ষক সন্মিলনীৰ সভাপতি বাবুল শইকীয়া, ৰঙাচাহী কলেজৰ অধ্যক্ষ ডঃ নৱ গাম, সোনাৰীআটী গাঁও পৰিচালনা সমিতি, যুৱ সংঘ, মহিলা সমিতি , মাজুলী-ডায়েৰী পৰিয়াল আদি বিভিন্ন অনুষ্ঠান প্ৰতিষ্ঠানে । মৃত্যুৰ সময়ত তেখেতে পত্নী, পুত্ৰ ,বোৱাৰী , বিবাহিতা জী, ককাই ভাই, নাতি ,বংশ পৰিয়াল ইহা সংসাৰত এৰি যায় ।