নিৰ্বাচনী প্ৰচাৰৰ চলাৱলৈ মাজুলীত উপস্থিত মন্ত্ৰী ড০ ৰনোজ পেগু , জয়ন্ত মল্ল বৰুৱা
বিকাশ শইকীয়া, মাজুলী,ৰঙিলী বাৰ্ত্তাসেৱা- দেশৰ আগন্তুক সাধাৰণ নিৰ্বাচনৰ দিন চমু চাপি অহাৰ লগে লগে ৰাজ্যখনৰ ১৪ টা সমষ্টিৰ ভিতৰত এইবাৰ নিৰ্বাচনী প্ৰচাৰ আকৰ্ষণীয় হৈছে ১৪ নং যোৰহাট লোকসভা সমষ্টিৰ। আজি দুদিনীয়া নিৰ্বাচনী প্ৰচাৰ কাৰ্যসূচী হাতত লৈ যোৰহাট লোকসভা সমষ্টিৰ বিজেপি মিত্ৰজোঁটৰ প্ৰাৰ্থী তপন কুমাৰ গগৈৰ হৈ নিৰ্বাচনী প্ৰচাৰ চলাৱলৈ মাজুলীত উপস্থিত হয় অসম চৰকাৰৰ কেবিনেট মন্ত্ৰী জয়ন্ত মল্ল বৰুৱা । মন্ত্ৰী গৰাকীয়ে প্ৰথমে বিজেপি মিত্ৰজোঁটৰ গড়মূৰস্থিত মুখ্য নিৰ্বাচনী কাৰ্য্যালয়ত মাজুলীৰ জেষ্ঠ নাগৰিক সকলৰ সৈতে সৌহাদ্যমূলক বাৰ্তালাপ অনুষ্ঠানত অংশগ্ৰহণ কৰে। ইয়াৰ পাছত মন্ত্ৰী গৰাকীয়ে ৰতনপুৰ-গায়ন পঞ্চায়তৰ অন্তৰ্গত নিকিনিখোৱা, বাঘেমাৰীত কোঁচ ৰাজবংশী জনসভাত অংশগ্ৰহণ কৰি নতুন বজাৰৰ পৰা মঙভালচুকলৈ এক পদযাত্ৰাত অংশগ্ৰহণ কৰে। কালিলৈ মন্ত্ৰী গৰাকীয়ে কৰতিপাৰ গাঁও পঞ্চায়তত এখনি ৰাজহুৱা নিৰ্বাচনী প্ৰচাৰ সভাত অংশগ্ৰহন কৰিব। ইফালে লখিমপুৰৰ পৰা মাজুলীত নতুনকৈ সংযোজন হোৱা লুইত খাবলু পঞ্চায়তৰ অন্তৰ্গত বৰালীমৰাত এখন জনসভাত অসম চৰকাৰৰ শিক্ষা মন্ত্ৰী ড০ ৰনোজ পেগুৱে বিজেপি মিত্ৰজোঁটৰ প্ৰাৰ্থী তপন কুমাৰ গগৈৰ হৈ নিৰ্বাচনী প্ৰচাৰ সভাত অংশগ্ৰহণ কৰে। সভাত মন্ত্ৰী গৰাকীৰ সৈতে উপস্থিত থাকে মাজুলী জিলা বিজেপিৰ সভাপতি বিৰেণ শইকীয়া আৰু মিত্ৰদল গণশক্তি আৰু অগপ দলৰ বহু নেতা কৰ্মী ।