জম্মু-কাশ্মীৰত সেনাৰ কনভয়ৰ ওপৰত আক্ৰমণ সন্ত্ৰাসবাদীৰ
ৰঙিলী বাৰ্ত্তাসেৱা- জম্মু-কাশ্মীৰৰ কঠুৱাত ভাৰতীয় সেনাৰ কনভয়ত সন্ত্ৰাসবাদীৰ ভয়ংকৰ আক্ৰমণৰ কৰাৰ ফলত ৫ জন সেনা জোৱান নিহত হোৱাৰ লগতে ৫ জন জোৱান আহত হয় । এই আক্ৰমণত ৪গৰাকী জোৱান থিতাতে নিহত হৈছিল যদিও হস্পাতালত এগৰাকী সেনা জোৱানৰ মৃত্যু হয়। বাকী ৫গৰাকী জোৱানৰ স্বাস্থ্য বৰ্তমান সুস্থিৰ বুলি জানিব পৰা গৈছে। কঠুৱা চহৰৰ পৰা ১৫০ কিলোমিটাৰ নিলগৰ লোহাই মালহাৰৰ বদনোটা গাঁৱৰ সমীপত সোমবাৰে বিয়লি প্ৰায় ৩.৩০ বজাত মাচেদি-কিন্দলী-মালহাৰ পথত নিয়মীয়াকৈ টহল দি থকা সেনাৰ বাহনত সন্ত্ৰাসবাদীয়ে গ্ৰেনেড নিক্ষেপ কৰি গুলীচালনা কৰে । নিৰাপত্তা বাহিনীয়ে প্ৰত্যুত্তৰ দিয়ে যদিও সন্ত্ৰাসবাদীকেইটা ওচৰৰ অৰণ্যলৈ পলায়ন কৰে বুলি বিষয়াসকলে জনায় ৷ উল্লেখ কৰা প্ৰয়োজন যে, বিগত ৪৮ঘন্টাত এয়া সেনা-সন্ত্ৰাসবাদীৰ মাজত দ্বিতীয়টো সংঘৰ্ষ। দেওবাৰে ৰাজোৰীত সেনাৰ গুলীত নিহত হৈছিল ৬টাকৈ সন্ত্ৰাসবাদী।