কলগাছিয়াৰ পাটবজাৰত ড্ৰাগছসহ এজন যুৱক আটক
ৰঙিলী বাৰ্ত্তাসেৱা- বৰপেটা জিলাৰ কলগাছিয়া আৰক্ষী থানাৰ নিচেই কাষত কলগাছিয়া পাটবজাৰত তিনিটা ড্ৰাগছ ভৰ্তি চাবোনৰ বাকচসহ এটা সৰবৰাহকাৰীক গ্ৰেপ্তাৰ কৰে আৰক্ষীয়ে । ধৃত সৰবৰাহকাৰী কলগাছিয়াৰ বলাইপাথাৰ গাঁৱৰ ছবুৰ উদ্দিন বুলি জানিব পৰা গৈছে। ধৃত সৰবৰাহকাৰীটোৱে প্ৰকৃততে গুৱাহাটীত দীৰ্ঘদিন ধৰি মিস্ত্ৰী হিচাপে কৰ্মৰত হৈ আছিল । দেওবাৰে নিশা ছবুৰ উদ্দিনে গুৱাহাটীৰ পৰা প্ৰথমবাৰৰ বাবে চাৰিটা চাবোনৰ বাকচত ড্ৰাগছ বিক্ৰীৰ বাবে আনিছিল যদিও কলগাছিয়াৰ মেহদি নামৰ আন এজন কুখ্যাত ড্ৰাগছ সৰবৰাহকাৰীয়ে এটা ড্ৰাগছৰ বাকচ কাঢ়ি লৈ যায় বুলি অভিযোগ উত্থাপন কৰে । পৰৱৰ্তী সময়ত স্থানীয় ৰাইজে ছবুৰ উদ্দিন নামৰ ড্ৰাগছ সৰবৰাহকাৰীক আটক কৰিবলৈ সক্ষম হয় যদিও মেহদি নামৰ আনটো কুখ্যাত ড্ৰাগছ সৰবৰাহকাৰীটো ঘটনাস্থলীৰ পৰা পলায়ন কৰে । পিছ মুহূৰ্তত ঘটনাস্থলীত কলগাছিয়া আৰক্ষী উপস্থিত হৈ ড্ৰাগছ সৰবৰাহকাৰীটোক গ্ৰেপ্তাৰ কৰি থানালৈ লৈ যায় ।